بصراحه اليوم بتكلم عن موضوع حصل معاي شخصيا ً و مع ولد خالتي و رفيجي .. الغش بطريقه جديده
اييلك اتصال مجهول من تلفون ارضي .. طبعا ً انا بقول اللي صارلي بكل صراحه بدون تحفظ على اسامي علشان يعرفون انه احنا مو مغفلين .. اول ما شلت التلفون ،، الو معاك شركه كويت تلي تك موزع معتمد من شركه الوطنيه للاتصالات و انت ربحت معانا تلفون جالكسي اس ٢ مع خط وطنيه و كل ما عليك انك تدفع دينارين فقط رسوم استلام الهديه
ههههه هذي اول جذبه .. شلون هديه و لها رسوم !!! ممكن احد يقولي شلون
المهم قلتله شلون حصلتوا على رقمي .. قال بمناسبه افتتاح مكتبنا الجديد اخذنا من الشركه الارقام و سوينا سحب عليهم و خذينا بينهم خمسين رقم
هذي ثاني جذبه .. انا خطي من شركه زين و اهوا يقول موزع معتمد من شركه الوطنيه للاتصالات ؟؟!! احد يوضحلي رقمي شدخله بالموضوع
المهم قلتله انا ماعرف اتفاهم بالتلفون وين مكتبكم و انا يايلكم بالطريج .. صدف اني كنت بجنوب السره باتجاه منطقه خيطان و مكتبهم بمنطقه الفروانيه بمجمع مغاتير
وو وصلت مغاتير و رحت المكتب ، اول ما دخلت ولا واحد ماسك التلفون و بيده لسته ارقام مادري من وين يايبها و يتصل على العالم و يقولهم نفس الكلام اللي قالياه .. انا من البدايه قلبي قارصني لكن الحق العيار لي باب الدار ، بشوف لي وين بنوصل معاهم ،، المهم قعدت قلتله لو سمحت ممكن تشرحلتي بشكل مفصل عن اللي ربحته منكم ؟؟ قالي و اهوا كان من الجنسيه المصريه .. اي ممكن
طبعا راح اقول بالضبط شنو صار و قال و راح اتشوفون تضارب اقوال بينه و بين الموظف الثاني اللي يدخل .. المهم ، يقول انت ما عليك الا بس تعطينا صوره بطاقتك المدنيه و دينارين رسوم استلام الهديه و اهيا عباره عن جهاز جالكسي اس ٢ و خط وطنيه رقم مميز .. سألته عن الخط هل هو بالتزام ( يعني التزم بدفع اشتراكه لمده سنه او سنتين مثلا ً ) قالي لااااا مو التزام ، قلت يعني اذا خذيته اقدر ثاني يوم ألغيه ،، قال لا لازم بعد مرور ثلاث شهور ، حسيت في تلاعب بالامر وقلتله ما عليك امر ممكن اتناديلي الاخ اللي كلمني بالتلفون قبل ما اييلكم ؟ قال اي افا عليك ،،، يااااا ياسر
و وصل ياسر و قلتله الحين بالنسبه للخط يعني جم ادفع اشتراكه ؟؟ ، قال بس ١٠ دنانير لكل شهر و لك ٣٠٠ دقيقه محليه مجانا ، قلتله انزين اذا بصكره مايصير ؟؟ قال لا عادي يصير بس لازم تدفع ١٥ دينار رسوم إلغاء الخط + ١٠ دنانير الاشتراك يعني المجموع ٢٥ دينار
في البدايه كلام الموظف الاولي كان ما يضير ألغي الخط و الثاني (ياسر) انه عادي الغيه ،، مو اهنيه الكلام
ما علينا من كلام نلغيه ما نلغيه ،، و اهوا يتكلم يت ببالي افكار وايد منها لو قلنا انه الخط بدفع عليه ٢٥ و الغيه و انا اساسا دفعت رسوم الهديه دينارين يعني المجموع اللي بدفعه اهوا ٢٧ دينار و بحصل جهاز جالكسي اس ٢ .. شي حلو و جميييل
باللحظه هذي يت ببالي سالفه قالياها صاحبي انه انصب عليه
فـ على طول سألت المظف الثاني (ياسر) التلفون صيني ؟؟ ارتبك و قالي صيني اصلي درجه اولى
سالفه صاحبي انه ياله المندوب لي البيت وقاله نفس كلامي تقريبا عدا التلفون كان معطيه تلفون نوكيا اللمس الجديد و الكرتون و كل شي يبين انه اصلي بدون كلام
وبعد الدفع و فتح العلبه اتضح انه التلفون صيني !! يعني انغش و ما يذكرون ابدا انه التلفون صيني و يعطونك اياه على انه اصلي دام انك ما تدري
هذي صوره لنفس التلفون اللي انغش فيه صاحبي على اساس انه نوكيا اصلي و بالنهايه يطلع صيني … و المضحك المبكي بالسالفه لمن قلت السالفه لولد خالتي قالي حته اهوا صارت فيه السالفه و ياله المندوب لي البيت و باعه تلفون صيني مع خط و التلفون طلع خربان ما يشحن و لمن يحاول يتصل باللي باعه الجهاز ما يرد عليه
بالنهايه حبيت انبه كل شخص يدير باله من هالاشخاص اللي يدعون بانهم شركات و اهما طبعا شركات وهميه و مزيفه غرضها الغش و التلاعب بعقول الناس
واللي يبي البيانات الشخصيه للي اتصلوا علي ، يتواصل معاي
ساعة الأرض هو حدث بيئي عالمي يشارك به الأفراد والشركات عن طريق إطفاء الإضاءة غير الضرورية لمدة ساعة واحدة في يوم محدد، لا لترشيد إستهلاك الكهرباء ولكن لبيان مدى قدرة البشرية على تقليل انبعاثات غاز ثاني أكسيد الكربون الناتجة عن حرق الوقود الإحفوري بشكل عام، والذي يعتبر السبب الرئيسي لظاهرة الاحتباس الحراري
ويعتبر الفريق الكويتي للإحتباس الحراري هو المنظم الرسمي لحدث ساعة الارض في الكويت منذ عام ٢٠٠٨ .. وتعتبر الكويت من أولى ال ١٣٥ دولة المشاركة في الحدث
وهذا فيديو توضيحي
والفريق حالياً يحتاج الى مصورين ليقوموا بتوثيق مشاركة الكويت في الحدث العالمي وللعلم سيتم إرسال الصور الى المنظم العالمي في إستراليا
